Wednesday, May 18, 2022

ವೈರಲ್​ ಆಯ್ತು ಸಿಕ್ಸ್ತ್​​ ಸೆನ್ಸ್​ ಸೀನನ ಪಂಚಿಂಗ್​ ಡೈಲಾಗ್..!

Must read

ಬೆಂಗಳೂರು: ರಾಯಲ್​ ಸ್ಟಾರ್ ವಿನಯ್​ ರಾಜ್​ಕುಮಾರ್​ ಅವರಿಗೆ ಹುಟ್ಟುಹಬ್ಬದ ಸಂಭ್ರಮ. ಈ ಬಾರಿ ಕ್ವಾರೆಂಟೈನ್​ನಲ್ಲೇ​ ಬರ್ತ್​ಡೇ ಸೆಲೆಬ್ರೇಟ್ ಮಾಡುತ್ತಿರೋ ಅವರು, ಬರ್ತ್​ಡೇ ಸ್ಪೆಷಲ್ಲಾಗಿ ‘ಗ್ರಾಮಾಯಣ’ ಚಿತ್ರದ ಸೆಕೆಂಡ್​ ಟೀಸರ್​ ಗಿಫ್ಟ್ ಕೊಟ್ಟಿದ್ದಾರೆ.

ದೊಡ್ಮನೆ ಮೊಮ್ಮೊಗ ವಿನಯ್​ ರಾಜ್​ಕುಮಾರ್​ ಅವರಿಗೆ ಹುಟ್ಟುಹಬ್ಬದ ಸಂಭ್ರಮ. ಲಾಕ್​​​​ಡೌನ್​​ ಹಿನ್ನೆಲೆ ಈ ಬಾರಿ ಅಭಿಮಾನಿಗಳನ್ನು ಭೇಟಿ ಮಾಡೋಕ್ಕೆ ಆಗಲಿಲ್ಲವಾದರೂ, ಅಭಿಮಾನಿಗಳಿಗೆ ಸ್ಪೆಷಲ್​ ಗಿಫ್ಟ್ ಅಂತೂ ಕೊಟ್ಟಿದ್ದಾರೆ. ಗ್ರಾಮಾಯಣ ಚಿತ್ರದ ಸೆಕೆಂಡ್​ ಟೀಸರ್ ರಿಲೀಸ್ ಆಗಿದೆ.

ಬರ್ತ್​ಡೇ ಸ್ಪೆಷಲ್ಲಾಗಿ ರಿಲೀಸ್​ ಆಗಿರೋ ಗ್ರಾಮಾಯಣ ಟೀಸರ್ ಈಗಾಗಲೇ ಸೋಶಿಯಲ್​ ಮೀಡಿಯಾದಲ್ಲಿ ಸಖತ್​ ಸುದ್ದಿ ಮಾಡುತ್ತಿದೆ. ಅಭಿಮಾನಿಗಳಿಂದ ಮೆಚ್ಚುಗೆ ಪಡೆದುಕೊಂಡಿದೆ. ಈ ಟೀಸರ್​ನ ಮೇಕಿಂಗ್​ ಅದ್ಬುತವಾಗಿದ್ದು, ವಿನಯ್​ ರಾಜ್​ಕುಮಾರ್ ಆ್ಯಕ್ಷನ್​ ದೃಶ್ಯಗಳು ಸಖತ್​ ವಿಭಿನ್ನವಾಗಿದೆ. ಇನ್ನು ಟೀಸರ್​ನಲ್ಲಿ ಬರೋ ‘ಬದುಕು ಬಗ್ಗಿಸ್ಕೊಂಡ್ ಅ ಆ ಇ ಕಲ್ಸೋಕ್ಕೆ ಮುಂಚೆ ನಾವೇ ಕೆಡ್ಕೊಂಡು ಕಾಗುಣಿತ ಕಲ್ಸಬೇಕು ಕನ್ಲಾ’ ಅನ್ನೋ ಡೈಲಾಗ್​ ಸಖತ್​ ವೈರಲ್​ ಆಗುತ್ತಿದೆ.

ಅಂದ್ಹಾಗೇ ಇದು ಗ್ರಾಮಾಯಣ ಚಿತ್ರದ ಸೆಕೆಂಡ್ ಟೀಸರ್ ಆಗಿದ್ದು, ಇದಕ್ಕೂ ಮುನ್ನ ರಿಲೀಸ್​ ಆಗಿದ್ದ ಟೀಸರ್ ಕೂಡ ಸಖತ್​ ಸೌಂಡ್ ಮಾಡಿತ್ತು. ಇದು ವಿನಯ್​ ರಾಜ್​ಕುಮಾರ್ ಅವರ 4ನೇ ಸಿನಿಮಾ ಆಗಿದ್ದು, ಫಸ್ಟ್ ಟೈಮ್​ ಹಳ್ಳಿ ಹೈದನಾಗಿ, ಗಡ್ಡ ಬಿಟ್ಟು, ಲುಂಗಿ ಕಟ್ಟಿ, ವಿಭಿನ್ನ ಗೆಟಪ್​ನಲ್ಲಿ ಕಾಣಿಸಿಕೊಳುತ್ತಿದ್ದಾರೆ. ವಿಶೇಷ ಅಂದ್ರೆ ಗಾಜನೂರಿನ ಅಣ್ಣಾವ್ರ ಮನೆ, ಅವರ ಓಡಾಡಿದ ಸುತ್ತಮುತ್ತಲಿನ ಜಾಗಗಳಲ್ಲಿ ಸಿನಿಮಾ ಚಿತ್ರೀಕರಣವಾಗಿದೆ. ಈಗಾಗಲೇ 50 ಪರ್ಸೆಂಟ್ ಶೂಟಿಂಗ್​ ಕೂಡ ಕಂಪ್ಲೀಟ್ ಆಗಿದೆ.

ಗ್ರಾಮಾಯಣ ಹಳ್ಳಿ ಸೊಗಡಿನ ಸಿನಿಮಾ ಆಗಿದ್ದು, ಹಳ್ಳಿಯ ಯುವಕರು ಪಟ್ಟಣದಲ್ಲಿ ನೆಲೆ ಕಂಡುಕೊಳ್ಳಲು ಮಾಡೋ ಹೋರಾಟ, ಜೊತೆಗೆ ಹಳ್ಳಿ ಜನರ ಮುಗ್ಧತೆ, ಸಂಸ್ಕ್ರತಿ, ಸೊಗಡು ಎಲ್ಲವನ್ನೂ ಈ ಚಿತ್ರದಲ್ಲಿ ಕಟ್ಟಿಕೊಡಲಾಗಿದೆ. ಇನ್ನು ರಂಗಭೂಮಿ ಪ್ರತಿಭೆ ದೇವನೂರು ಚಂದ್ರು ಈ ಆ್ಯಕ್ಷನ್​ ಕಟ್ ಹೇಳುತ್ತಿದ್ದು, ಅಮೃತಾ ಅಯ್ಯರ್ ಅವರು ನಾಯಕಿಯಾಗಿ ಮಿಂಚ್ತಿದ್ದಾರೆ. ಇನ್ನು ಎನ್​ಎಲ್​ಎನ್​ ಸಂಸ್ಥೆ ನಿರ್ಮಾಣ ಹಾಗೂ ಪೂರ್ಣಚಂದ್ರ ತೇಜಸ್ವಿ ಸಂಗೀತ, ಅಭಿಷೇಕ್​ ಜಿ. ಕಾಸರಗೋಡು ಕ್ಯಾಮೆರಾ ವರ್ಕ್​ ಚಿತ್ರಕ್ಕಿದೆ.

Also read:  'ನನ್ನ ತಾಕತ್​ ಏನೆಂಬುದನ್ನು ಕೆ.ಸಿ ನಾರಾಯಣಗೌಡಗೆ ತೋರಿಸ್ತೀನಿ'

ಸಿಕ್ಸ್ತ್​​ ಸೆನ್ಸ್​ ಸೀನನಾಗಿ ವಿನಯ್​ ಲುಕ್ಕು, ಖದರ್ರು, ವಿಲೇಜ್​ ಬ್ಯಾಕ್​ಡ್ರಾಪ್​​​ ಎಲ್ಲಾ ನೋಡುತ್ತಿದ್ದರೆ, ತೆಲುಗಿನ ರಂಗಸ್ಥಳಂ ಸಿನಿಮಾವನ್ನು ನೆನಪಿಸುವಂತಿದೆ. ಒಟ್ಟಾರೆಯಾಗಿ ವಿನಯ್​ ರಾಜ್​ಕುಮಾರ್ ಅವರು ಹಿಂದಿನ ಮೂರು ಸಿನಿಮಾಗಳಿಗಿಂತ ಗ್ರಾಮಾಯಣ ಚಿತ್ರದಲ್ಲಿ ವಿಭಿನ್ನ ಪಾತ್ರದಲ್ಲಿ ಮಿಂಚ್ತಿದ್ದು, ಹುಟ್ಟುಹಬ್ಬದ ದಿನ ರಿಲೀಸ್​​​ ಆಗಿರೋ ಟೀಸರ್​ಗೆ ಪಾಸಿಟಿವ್​ ರೆಸ್ಪಾನ್ಸ್​ ಸಿಕ್ಕಿದೆ.

Latest article